Մամուլի հաղորդագրություն
ՀՀ ԳԱԱ Վ. Համբարձումյանի անվ. Բյուրականի աստղադիտարան
Մամուլի հաղորդագրություն 18.02.2021
ՆԱՍԱ-Ի ՆՈՐ ՄԱՐՍԱԳՆԱՑԸ ՎԱՅՐԷՋՔ ԿԿԱՏԱՐԻ ԿԱՐՄԻՐ ՄՈԼՈՐԱԿԻ ՎՐԱ
Այսօր՝ փետրվարի 18-ին, ՆԱՍԱ-ի նոր Perseverance մարսագնացը կհասնի Կարմիր մոլորակ։ Վայրէջքը նախատեսվում է իրականացնել 45կմ (28 մղոն) լայնությամբ Եզերո խառնարանում ԱՄՆ-ի արևելյան ժամանակով մոտ 15։00-ին։
Առաքելության նախնական տևողությունը սահմանված է մեկ մարսյան տարի՝ 687 երկրային օր։
Մեքենայի չափ ունեցող այս մարսագնացը անցյալի մանրէաբանական կյանքի նշանների որոնմանը զուգահեռ կզբաղվի նաև բնակելի միջավայրերի փնտրտուքներով։ Բացի այդ ՆԱՍԱ-ն հույս է հայտնում, որ այս ռոբոտ-ճամփորդը կհավաքի նմուշներ, որոնք Երկիր կբերվեն մոտ տաս տարի անց նոր առաքելության միջոցով։
Նշենք, որ մարսագնացը ՆԱՍԱ-ի 2,7 միլիարդ դոլար արժողության Մարսյան 2020թ․ առաքելության գլխավոր մասն է կազմում։ Այն արձակվել է 2020թ-ի հուլիսի 30-ին Ֆլորիդայի Կանավերալ հրվանդանի ռազմաօդային կայանից։ Ժամանակն ընտրվել էր այնպես, որ Երկիրը և Մարսը տեղակայված լինեին միջմոլորակային ճանապարհորդությունների համար ամենաքիչ էներգիա պահանջող դիրքում։
Վայրէջքին ուղիղ միացմամբ կարող եք հետևել այս հղումով՝ https://www.space.com/17933-nasa-television-webcasts-live-space-tv.html:
Մելինե Ասրյան
